A Consellería de Educación e Ordenación Universitaria da Xunta de Galicia implantou un programa de gratuidade de libros de texto.

O programa de gratuidade ten como obxectivo axudar ás familias a sufragar os custos de adquisición dos libros de texto.

Os libros adquiriranse pola Administración e cederanse para o seu uso polo alumnado, entendéndose estas axudas como subvención en especie.

O programa de gratuidade será de aplicación a todo o alumnado de centros sostidos con fondos públicos da Comunidade Autónoma de Galicia. Os centros facilitarán ao alumnado de ensino obrigatorio e de educación especial, mediante o sistema de préstamo, os libros de texto.

A xestión do Programa de Gratuidade de libros de texto e materiais curriculares do alumnado de centros sostidos con fondos público para o CURSO 2008/2009 introduce como novidade o Cheque-Libro.

As familias recibirán un Cheque-Libro EDUCADHOC que será cambiable por libros de texto e materiais curriculares.

No curso escolar 2008-2009 realizaranse as seguintes actuacións:

• Reposición total dos libros de 1º, 2º, 3º e 4º de educación primaria, e 2º e 4º de educación secundaria obrigatoria, así como, os de educación especial.
• Reposición por incremento de alumnado ou por deterioración de libros de texto en 5º e 6º de educación primaria e 1º e 3º de educación secundaria obrigatoria.